مشكلتي الوحيدة فالحياة شحال من واحد باغي بحالها

الجمعة 21 ديسمبر 2012
أخر تحديث : الأحد 23 ديسمبر 2012 - 12:55 صباحًا
مشكلتي الوحيدة فالحياة شحال من واحد باغي بحالها

ماعرفتش واش غادي تضحكو عليا يلا قلت ليكم هادي هي مشكلتي الوحيدة فالحياة
ولكن راه بصاح هي اكبر مشكلة عندي

, انا كانتخلص اكتر من راجلي بزاااف يعني باش تفهمو مزيان, هو كايتخلص شي 3000 درهم وانا تقريبا 10000 درهم, يعني فرق مهم…,المشكل هو انه مافيه حتا شي مشكل يعني هو ماشي من دوك الرجال اللي كايبغي يزربو علا زوجاتهم و يديوليهم كلشي, بالعكس هو بنفسو و ماكايرضاش, وولد الناس معايا الى اقصى درجة, و حنين و ضريف و كاع الصفات الزوينه فيه الحمد لله و الشكر لله…المشكل يتلخص فجوج حاجات, الاولى هو انه تعود من نهار تزوجنا هادي عامين اني كانساهم بكل ما املك كيف ما كايقولو, بخاطري من طبيعة الحال, ولكن دابا مع الدوام ماوليتش كانحس ان كاندير هادشي بخاطري, ولا بحال يلا مفروض عليا , و ماحدي كانديرو, صافي مزيان هاني زوينة , غير كانفكر انني ندير شي حاجة لراسي او نبغي ندير شي حاجة علا جنب صافي كايدير هاداك الوجه المحكور, و كايبقا يقول ليا يوا الالا بالصحة والراحة نتي اللي جات معاك, كاتخلصي مزيان معا راساتك ماشي بحالي انا..و كايخليني كانحس بالدنب و كانبقا نقول كيفاش هو ماعندوش و انا عندي? حاجة اخرا هي عائلتو, هما عارفينو شحال كايتخلص ورغم دلك كايتسناو منو انه يدير شي حاجات خارقة للعادة معاهم فاي حاجة وقعات خاصو يكون هو الاول مبند و سواء عندو او ماعندوش خاصو يعاون, وانا عارفاهم كاينتاضرو منو انه يكون معول عليا, و باش مانكونش ضالماهم غير هما, حتا هو ماكايقولش ليهم لا, و ماكايحاولش يتناقش معاهم, كايمشي يحط ليهم هاديك جوج دريال و كايجي يقول ليا ويلي ماشفتيش اش وقع راه اضطريت نعطي هاد الفلوس للواليدة راها مسافرة او اي حاجة من هادا القبيل, اما يلا كان شي واحد غادي يعرس ولا يسبع صافي مشينا فيها..او كاع يلا ماحطنيش امام الامر الواقع كايجي و كايبقا يبكي و يشكي و يقول ليا راه خاصني نعطيهم هادي و ندير ليهم هادي, انا ماعنديش مشكل يعاونهم, و ربي اللي شاهد شحال من مرة انا كانعطيه كانقول ليه سير عطي هادي لماماك و خوتك حتا لواحد الوقت اكتاشفت بان داكشي ولا بحال يلا بالزز و ماحدي كانديرو راني مزيانة غير كانحبس كانولي انا هي الجن الكحل..فاش يلاه تزوجنا, كان كايشد غير النص ديال الخلصة و كنت انا قايمة بكولشي حتا من العرس, قلت راه المهم هو مزيان , و منين غير غادي نتجمعو فالحلال ماشي مشكل, و لحد الان انا مانادماش , ولكن صافي راه عييت بغيت نبدا نحط شي حاجة للدنيا و الزمان, وليت حتا كانخاف نمرض, حيت مادايرة تحتي والو..حاجة وحدة اللي ماكايهضرش معايا فيها هي الفلوس اللي كانسيفط لواليديا من غير داكشي الريال ماكايشيط ليا مابين الكريديات و المصاريف…دابا علاش انا بغيت نستاشر معاكم حيت هاد الشهر غادي يتقادا واحد الكريدي عندي, وماعارفاش كيفاش غادي ندير واش نتناقش معاه مباشرة و نقول ليه راه غادي نبقا كانساهم معاه كيف قبل ولكن غادي نبقا نخلي شي حاجة علا جنب, حيت فكرت غير نجي ونبدا بلا مانهدر معاه ولكن هو من دابا كايدير بلاناتو وكايقول ليا انا كانتسنا غير امتا يجي هاد الشهر باش يتسالا هاد الكريدي و نتهناو, نتبرعو لينا شوية…و هو عزيز عليا بزاف ماكانبغيهش يحس بيا كانعيق عليه بصالير ديالي, او انه اقل شان مني حيت هو كايتخلص اقل, هاداكشي علاش حايرة و ماعارفاش الطريقة باش نهدر معاه و فنفس الوقت ماباغاش نستمر فهاد الوضع, خصوصا و اننا كانحاولو دابا باش نديرو شي بيبي الله يسير و مايمكنش يبقا الوضع هاكدا..سمحو ليا بزااااااف طولت انا عارفة ولكن والله يلا هاد المشكل معصبني و وخا شحال من وحدة ماخداماش كاتقول ليا سعداتك بخدمتك انا كانحسدها علا انها جالسة فدارها كيف الاميرة ولي ربحها راجلها قليلة او كتيرة كايعيشو بيها و كاتبقا المرا مرا والراجل راجل..

رابط مختصر

اتـرك تـعـلـيـق 93 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة موقعي للمرأة المغربية الالكترونية وهي تلزم بمضمونها كاتبها حصرياً.

  • ZINEB
  • صوفية
  • mohammed
  • الاسم (مطلوب)
  • salaheddine
عرض المزيد من التعليقات